كتبت ايمان جابر
متفضلش تعاتب فى نفسك وتقول أنا أهبل وغبى
لأن بسامح الناس كتير وبكون جدع وبيقابلوا طيبتى بقسوة وعذر
إنت اللى زيك المفروض يكون فخور بقلبه وكيانه فى الدنيا دى
ومقامه الكبير عند ربنا وجايزته الكبيرة اللى متحضراله فى الأخرة
قال رسول الله ﷺ ” حرم على النار كل
هين ، لين ، سهل ، قريب من الناس”
تخيل نار متمسش جسمك لمجرد إنك كنت سهل فى تعاملك مع الناس
سهل فى إرضائك لما شخص قالك أنا أسف مش هكررها تانى
سهل ولين لما كان جواك كلمه صعبة عارف إنها هتأذى قلب فكتمتها
ومردتش على صحابها فى دنيا بتنافس فيها البعض بمين يكون لسانه أطول !
سهل فى البيع والشراء وفى كل حاجة ترضى ربنا مع البشر
هين ولين وسهل لما بعدت عن شخص من سكات , لا بصريخ
ولا بزعيق ولا بفضيحه ولا معايرة وتلقيح ولا بتهون عليك العشرة ولا
ربيت جواك دوافع انتقام وكره ، وبتسامح أى حد وبتسيب الباقى على ربنا
هين ولين وسهل لما نافسك شخص فى إنه يحرق
دمك وحسس نفسه إنه أنتصر عليك , فى حين أنك عاملته
بالأدب الربانى ” وَإِذَا خَاطَبَهُمُ الْجَاهِلُونَ قَالُوا سَلامًا ”